TIRANË-Një deklaratë e ish.zv-kryeministrit Arben Hametaj, i cili pretendon për një strukturë të organizuar për trafikimin e armëve, të cilat vijnë nga vende të Afrikës, paketohen në Shqipëri dhe më pas dërgohen drejt destinacioneve të tjera, ka bërë që Timak Defence, (një shoqëri e cila operon në fushën e prodhimit, pajisjes dhe modifikimit të automjeteve ushtarake e civile të specializuara, si dhe pajisjeve të sigurisë dhe mbrojtjes), të vendoset në qendër të hetimit të SPAK.
Kompania e cila zotërohet nga TIMAK sh.p.k. me aksionerë kryesorë Arjeta Pucën, biznesmenin izraelit Ron Yeffet, dhe KAYO sh.a. e cila administrohet nga Ardi Veliu, rezulton të ketë marrë nga buxheti i shtetit 2.9 miliardë lekë (2,919,616,666 lekë), që nga momenti i themelimit të saj, në Gusht të viti 2025. Sipas të dhënave të publikuara në Open Data, 1 miliardë lekë janë përfituar vetëm për vitin 2025, ndërsa deri në korrik të 2026, janë dhënë 1.9 miliardë lekë.
Tableta më poshtë tregojnë se për çfarë kanë shkuar lekët, ku kryesisht thuhet se janë shpenzuar për mjete dhe pajisje teknike, makina dhe mjete policore.
Mesditën e 2 tetorit, agjentë të SPAK-ut dhe BKH-së ushtruan dje kontrolle në banesa, kompani dhe zyra, ndërsa tashmë në duart e hetuesve të SPAK-ut ndodhen telefona, kontrata dhe dokumente të lidhura me kompaninë shtetërore KAYO. Biznesmeni amerikano-izraelit Ron Yeffet është në qendër të hetimit, në kuadër të denoncimve të bëra pak javë më parë nga ish zv/kryeministri në arrati Arben Ahmetaj, i cili aludonte për trafik armësh dhe afere të tjera të biznesmenit me kompaninë publike KAYO.
Me vendim të GJKKO-së, hetuesit zbarkuan në vilën luksoze të Ron Yeffet në periferi të Tiranës, të cili i është sekuestruar telefoni. Gjithashtu u kontrollua edhe banesa e Ardi Veliut, administratorit të KAYO, por ky i fundit mësohet se nuk është gjetur aty, ndërsa telefoni i është sekuestruar në zyrën e tij të punës.
Hetuesit kanë kontrolluar gjithashtu banesën e Arjeta Pucës, pronare e kompanisë TIMAK. Aksioni është shtrirë edhe në Ministrinë e Mbrojtjes, ku mësohet se janë sekuestruar disa kontrata dhe dokumente, të cilat tashmë janë në dispozicion të hetuesve të SPAK. Gjithashtu, është sekuestruar edhe telefoni i Aleks Markut, sekretar i përgjithshëm në Ministrinë e Mbrojtjes.
Hetimet po zhvillohen pas përgjimeve të publikuara nga ish-zv.kryeministri në arrati Arben Ahmetaj, për trafik armësh përmes "KAYO". Ahmetaj ngriti një sërë akuzash, mes tyre për një skemë të trafikut ndërkombëtar të armëve, ku përfshihet Shqipëria.
